ปัญจิเม คะหะปะตะโย อานิสังสา สีละวะโต สีละสัมปะทายะ. กะตะเม ปัญจะ.

Pañcime gahapatayo ānisaṃsā sīlavato sīlasampadāya. Katame pañca.

“Householders, there are these five benefits of one who is virtuous, accomplished in virtue. What five?

อิธะ คะหะปะตะโย สีละวา สีละสัมปันโน อัปปะมาทาธิกะระณัง มะหันตัง โภคักขันธัง อะธิคัจฉะติ. อะยัง ปะฐะโม อานิสังโส สีละวะโต สีละสัมปะทายะ.

Idha gahapatayo sīlavā sīlasampanno appamādādhikaraṇaṃ mahantaṃ bhogakkhandhaṃ adhigacchati. Ayaṃ paṭhamo ānisaṃso sīlavato sīlasampadāya.

Here, householders, a virtuous person, accomplished in virtue, acquires great wealth through diligence. This is the first benefit of one who is virtuous, accomplished in virtue.

ปุนะ จะปะรัง คะหะปะตะโย สีละวะโต สีละสัมปันนัสสะ กัล๎ยาโณ กิตติสัทโท อัพภุคคัจฉะติ. อะยัง ทุติโย อานิสังโส สีละวะโต สีละสัมปะทายะ.

Puna caparaṃ gahapatayo sīlavato sīlasampannassa kalyāṇo kittisaddo abbhuggacchati. Ayaṃ dutiyo ānisaṃso sīlavato sīlasampadāya.

Again, householders, for a virtuous person, accomplished in virtue, a good reputation spreads far and wide. This is the second benefit of one who is virtuous, accomplished in virtue.

ปุนะ จะปะรัง คะหะปะตะโย สีละวา สีละสัมปันโน ยัญญะเทวะ ปะริสัง อุปะสังกะมะติ, ยะทิ ขัตติยะปะริสัง ยะทิ พ๎ราห๎มะณะปะริสัง ยะทิ คะหะปะติปะริสัง ยะทิ สะมะณะปะริสัง, วิสาระโท อุปะสังกะมะติ อะมังกุภูโต. อะยัง ตะติโย อานิสังโส สีละวะโต สีละสัมปะทายะ.

Puna caparaṃ gahapatayo sīlavā sīlasampanno yaññadeva parisaṃ upasaṅkamati, yadi khattiyaparisaṃ yadi brāhmaṇaparisaṃ yadi gahapatiparisaṃ yadi samaṇaparisaṃ, visārado upasaṅkamati amaṅkubhūto. Ayaṃ tatiyo ānisaṃso sīlavato sīlasampadāya.

Again, householders, a virtuous person, accomplished in virtue, approaches any assembly-whether of nobles, brahmins, householders, or ascetics-confidently and without embarrassment. This is the third benefit of one who is virtuous, accomplished in virtue.

ปุนะ จะปะรัง คะหะปะตะโย สีละวา สีละสัมปันโน อะสัมมูฬโห กาลัง กะโรติ. อะยัง จะตุตโถ อานิสังโส สีละวะโต สีละสัมปะทายะ.

Puna caparaṃ gahapatayo sīlavā sīlasampanno asammūḷho kālaṃ karoti. Ayaṃ catuttho ānisaṃso sīlavato sīlasampadāya.

Again, householders, a virtuous person, accomplished in virtue, dies unconfused. This is the fourth benefit of one who is virtuous, accomplished in virtue.

ปุนะ จะปะรัง คะหะปะตะโย สีละวา สีละสัมปันโน กายัสสะ เภทา ปะรัง มะระณา สุคะติง สัคคัง โลกัง อุปะปัชชะติ. อะยัง ปัญจะโม อานิสังโส สีละวะโต สีละสัมปะทายะ.

Puna caparaṃ gahapatayo sīlavā sīlasampanno kāyassa bhedā paraṃ maraṇā sugatiṃ saggaṃ lokaṃ upapajjati. Ayaṃ pañcamo ānisaṃso sīlavato sīlasampadāya.

Again, householders, a virtuous person, accomplished in virtue, after the breakup of the body, after death, is reborn in a good destination, in a heavenly world. This is the fifth benefit of one who is virtuous, accomplished in virtue.

อิเม โข คะหะปะตะโย ปัญจะ อานิสังสา สีละวะโต สีละสัมปะทายาติ.

Ime kho gahapatayo pañca ānisaṃsā sīlavato sīlasampadāyāti.

These, householders, are the five benefits of one who is virtuous, accomplished in virtue.”