เอกัง สะมะยัง ภะคะวา เวรัญชายัง วิหะระติ นะเฬรุปุจิมัณเฑ. อะถะ โข ปะหาราโท อะสุรินโท เยนะ ภะคะวา เตนุปะสังกะมิ, อุปะสังกะมิต๎วา ภะคะวันตัง อะภิวาเทต๎วา เอกะมันตัง อัฏฐาสิ. เอกะมันตัง ฐิตัง โข ปะหาราทัง อะสุรินทัง ภะคะวา เอตะทะโวจะ: “อะปิ ปะนะ ปะหาราทะ, อะสุรา มะหาสะมุทเท อะภิระมันตี”ติ? “อะภิระมันติ, ภันเต, อะสุรา มะหาสะมุทเท”ติ. “กะติ ปะนะ, ปะหาราทะ, มะหาสะมุทเท อัจฉะริยา อัพภุตะธัมมา เย ทิส๎วา ทิส๎วา อะสุรา มะหาสะมุทเท อะภิระมันตี”ติ “อัฏฐะ, ภันเต, มะหาสะมุทเท อัจฉะริยา อัพภุตะธัมมา เย ทิส๎วา ทิส๎วา อะสุรา มะหาสะมุทเท อะภิระมันติ. กะตะเม อัฏฐะ

Ekaṃ samayaṃ Bhagavā Verañjāyaṃ viharati Naḷerupucimaṇḍe. Atha kho Pahārādo asurindo yena Bhagavā tenupasaṅkami, upasaṅkamitvā Bhagavantaṃ abhivādetvā ekamantaṃ aṭṭhāsi. Ekamantaṃ ṭhitaṃ kho Pahārādaṃ asurindaṃ Bhagavā etadavoca: “Api pana Pahārāda, asurā mahāsamudde abhiramantī”ti? “Abhiramanti, bhante, asurā mahāsamudde”ti. “Kati pana, Pahārāda, mahāsamudde acchariyā abbhutadhammā ye disvā disvā asurā mahāsamudde abhiramantī”ti “Aṭṭha, bhante, mahāsamudde acchariyā abbhutadhammā ye disvā disvā asurā mahāsamudde abhiramanti. Katame aṭṭha

At one time the Blessed One was staying at Verañjā, at the root of the Naḷeru tree. Then Pahārāda, the lord of the Asuras, approached the Blessed One. Having approached, he paid homage to the Blessed One and stood to one side. Standing to one side, the Blessed One said to Pahārāda, the lord of the Asuras: “Pahārāda, do the Asuras delight in the great ocean?” “They do, Bhante, the Asuras delight in the great ocean.” “How many, Pahārāda, are the wonderful and marvelous qualities of the great ocean, seeing which the Asuras delight in the great ocean?” “There are eight, Bhante, wonderful and marvelous qualities of the great ocean, seeing which the Asuras delight in the great ocean. What eight?

มะหาสะมุทโท, ภันเต, อะนุปุพพะนินโน อะนุปุพพะโปโณ อะนุปุพพะปัพภาโร, นายะตะเกเนวะ ปะปาโต. ยัมปิ, ภันเต, มะหาสะมุทโท อะนุปุพพะนินโน อะนุปุพพะโปโณ อะนุปุพพะปัพภาโร, นายะตะเกเนวะ ปะปาโต, อะยัง, ภันเต, มะหาสะมุทเท ปะฐะโม อัจฉะริโย อัพภุตะธัมโม ยัง ทิส๎วา ทิส๎วา อะสุรา มะหาสะมุทเท อะภิระมันติ.

Mahāsamuddo, bhante, anupubbaninno anupubbapoṇo anupubbapabbhāro, nāyatakeneva papāto. Yampi, bhante, mahāsamuddo anupubbaninno anupubbapoṇo anupubbapabbhāro, nāyatakeneva papāto, ayaṃ, bhante, mahāsamudde paṭhamo acchariyo abbhutadhammo yaṃ disvā disvā asurā mahāsamudde abhiramanti.

Bhante, the great ocean has a gradual slope, a gradual incline, a gradual depth; it does not suddenly drop off. In that the great ocean has a gradual slope, a gradual incline, a gradual depth, and does not suddenly drop off, this is the first wonderful and marvelous quality of the great ocean, seeing which the Asuras delight in it.

ปุนะ จะปะรัง, ภันเต, มะหาสะมุทโท ฐิตะธัมโม เวลัง นาติวัตตะติ. ยัมปิ, ภันเต, มะหาสะมุทโท ฐิตะธัมโม เวลัง นาติวัตตะติ, อะยัง, ภันเต, มะหาสะมุทเท ทุติโย อัจฉะริโย อัพภุตะธัมโม ยัง ทิส๎วา ทิส๎วา อะสุรา มะหาสะมุทเท อะภิระมันติ.

Puna caparaṃ, bhante, mahāsamuddo ṭhitadhammo velaṃ nātivattati. Yampi, bhante, mahāsamuddo ṭhitadhammo velaṃ nātivattati, ayaṃ, bhante, mahāsamudde dutiyo acchariyo abbhutadhammo yaṃ disvā disvā asurā mahāsamudde abhiramanti.

Again, Bhante, the great ocean remains stable and does not overstep its boundary. In that the great ocean remains stable and does not overstep its boundary, this is the second wonderful and marvelous quality of the great ocean, seeing which the Asuras delight in it.

ปุนะ จะปะรัง, ภันเต, มะหาสะมุทโท นะ มะเตนะ กุณะเปนะ สังวะสะติ. ยัง โหติ มะหาสะมุทเท มะตัง กุณะปัง ตัง ขิปปะเมวะ ตีรัง วาเหติ, ถะลัง อุสสาเรติ. ยัมปิ, ภันเต, มะหาสะมุทโท นะ มะเตนะ กุณะเปนะ สังวะสะติ, ยัง โหติ มะหาสะมุทเท มะตัง กุณะปัง ตัง ขิปปะเมวะ ตีรัง วาเหติ, ถะลัง อุสสาเรติ, อะยัง, ภันเต, มะหาสะมุทเท ตะติโย อัจฉะริโย อัพภุตะธัมโม ยัง ทิส๎วา ทิส๎วา อะสุรา มะหาสะมุทเท อะภิระมันติ.

Puna caparaṃ, bhante, mahāsamuddo na matena kuṇapena saṃvasati. Yaṃ hoti mahāsamudde mataṃ kuṇapaṃ taṃ khippameva tīraṃ vāheti, thalaṃ ussāreti. Yampi, bhante, mahāsamuddo na matena kuṇapena saṃvasati, yaṃ hoti mahāsamudde mataṃ kuṇapaṃ taṃ khippameva tīraṃ vāheti, thalaṃ ussāreti, ayaṃ, bhante, mahāsamudde tatiyo acchariyo abbhutadhammo yaṃ disvā disvā asurā mahāsamudde abhiramanti.

Again, Bhante, the great ocean does not associate with a corpse. Whatever corpse there is in the great ocean, it quickly carries it to the shore and throws it up on land. In that the great ocean does not associate with a corpse, but quickly carries it to the shore and throws it up on land, this is the third wonderful and marvelous quality of the great ocean, seeing which the Asuras delight in it.

ปุนะ จะปะรัง, ภันเต, ยา กาจิ มะหานะทิโย เสยยะถิทัง คังคา ยะมุนา อะจิระวะตี สะระภู มะหี, ตา มะหาสะมุททัง ปัต๎วา ชะหันติ ปุริมานิ นามะโคตตานิ, มะหาสะมุทโทต๎เววะ สังขัง คัจฉันติ. ยัมปิ, ภันเต, ยา กาจิ มะหานะทิโย เสยยะถิทัง คังคา ยะมุนา อะจิระวะตี สะระภู มะหี, ตา มะหาสะมุททัง ปัต๎วา ชะหันติ ปุริมานิ นามะโคตตานิ, มะหาสะมุทโทต๎เววะ สังขัง คัจฉันติ, อะยัง, ภันเต, มะหาสะมุทเท จะตุตโถ อัจฉะริโย อัพภุตะธัมโม ยัง ทิส๎วา ทิส๎วา อะสุรา มะหาสะมุทเท อะภิระมันติ.

Puna caparaṃ, bhante, yā kāci mahānadiyo seyyathidaṃ Gaṅgā Yamunā Aciravatī Sarabhū Mahī, tā mahāsamuddaṃ patvā jahanti purimāni nāmagottāni, mahāsamuddotveva saṅkhaṃ gacchanti. Yampi, bhante, yā kāci mahānadiyo seyyathidaṃ Gaṅgā Yamunā Aciravatī Sarabhū Mahī, tā mahāsamuddaṃ patvā jahanti purimāni nāmagottāni, mahāsamuddotveva saṅkhaṃ gacchanti, ayaṃ, bhante, mahāsamudde catuttho acchariyo abbhutadhammo yaṃ disvā disvā asurā mahāsamudde abhiramanti.

Again, Bhante, whatever great rivers there are, such as the Ganges, Yamunā, Aciravatī, Sarabhū, and Mahī, when they reach the great ocean, they abandon their former names and identities and are simply called ‘the great ocean.’ In that the great rivers, upon reaching the great ocean, abandon their former names and identities and are known simply as the great ocean, this is the fourth wonderful and marvelous quality of the great ocean, seeing which the Asuras delight in it.

ปุนะ จะปะรัง, ภันเต, ยา กาจิ โลเก สะวันติโย มะหาสะมุททัง อัปเปนติ, ยา จะ อันตะลิกขา ธารา ปะปะตันติ, นะ เตนะ มะหาสะมุททัสสะ อูนัตตัง วา ปูรัตตัง วา ปัญญายะติ. ยัมปิ, ภันเต, ยา กาจิ โลเก สะวันติโย มะหาสะมุททัง อัปเปนติ, ยา จะ อันตะลิกขา ธารา ปะปะตันติ, นะ เตนะ มะหาสะมุททัสสะ อูนัตตัง วา ปูรัตตัง วา ปัญญายะติ, อะยัง, ภันเต, มะหาสะมุทเท ปัญจะโม อัจฉะริโย อัพภุตะธัมโม ยัง ทิส๎วา ทิส๎วา อะสุรา มะหาสะมุทเท อะภิระมันติ.

Puna caparaṃ, bhante, yā kāci loke savantiyo mahāsamuddaṃ appenti, yā ca antalikkhā dhārā papatanti, na tena mahāsamuddassa ūnattaṃ vā pūrattaṃ vā paññāyati. Yampi, bhante, yā kāci loke savantiyo mahāsamuddaṃ appenti, yā ca antalikkhā dhārā papatanti, na tena mahāsamuddassa ūnattaṃ vā pūrattaṃ vā paññāyati, ayaṃ, bhante, mahāsamudde pañcamo acchariyo abbhutadhammo yaṃ disvā disvā asurā mahāsamudde abhiramanti.

Again, Bhante, whatever streams in the world flow into the great ocean, and whatever rain falls from the sky, by that the great ocean is not seen to increase or decrease. In that the great ocean is not seen to increase or decrease despite the inflow of waters, this is the fifth wonderful and marvelous quality of the great ocean, seeing which the Asuras delight in it.

ปุนะ จะปะรัง, ภันเต, มะหาสะมุทโท เอกะระโส โลณะระโส. ยัมปิ, ภันเต, มะหาสะมุทโท เอกะระโส โลณะระโส, อะยัง, ภันเต, มะหาสะมุทเท ฉัฏโฐ อัจฉะริโย อัพภุตะธัมโม ยัง ทิส๎วา ทิส๎วา อะสุรา มะหาสะมุทเท อะภิระมันติ.

Puna caparaṃ, bhante, mahāsamuddo ekaraso loṇaraso. Yampi, bhante, mahāsamuddo ekaraso loṇaraso, ayaṃ, bhante, mahāsamudde chaṭṭho acchariyo abbhutadhammo yaṃ disvā disvā asurā mahāsamudde abhiramanti.

Again, Bhante, the great ocean has one taste, the taste of salt. In that the great ocean has one taste, the taste of salt, this is the sixth wonderful and marvelous quality of the great ocean, seeing which the Asuras delight in it.

ปุนะ จะปะรัง, ภันเต, มะหาสะมุทโท พะหุระตะโน อะเนกะระตะโน. ตัต๎ริมานิ ระตะนานิ เสยยะถิทัง มุตตา มะณิ เวฬุริโย สังโข สิลา ปะวาฬัง ระชะตัง ชาตะรูปัง โลหิตะโก มะสาระคัลลัง. ยัมปิ, ภันเต, มะหาสะมุทโท พะหุระตะโน อะเนกะระตะโน, ตัต๎ริมานิ ระตะนานิ เสยยะถิทัง มุตตา มะณิ เวฬุริโย สังโข สิลา ปะวาฬัง ระชะตัง ชาตะรูปัง โลหิตะโก มะสาระคัลลัง, อะยัง ภันเต มะหาสะมุทเท สัตตะโม อัจฉะริโย อัพภุตะธัมโม ยัง ทิส๎วา ทิส๎วา อะสุรา มะหาสะมุทเท อะภิระมันติ.

Puna caparaṃ, bhante, mahāsamuddo bahuratano anekaratano. Tatrimāni ratanāni seyyathidaṃ muttā maṇi veḷuriyo saṅkho silā pavāḷaṃ rajataṃ jātarūpaṃ lohitako masāragallaṃ. Yampi, bhante, mahāsamuddo bahuratano anekaratano, tatrimāni ratanāni seyyathidaṃ muttā maṇi veḷuriyo saṅkho silā pavāḷaṃ rajataṃ jātarūpaṃ lohitako masāragallaṃ, ayaṃ bhante mahāsamudde sattamo acchariyo abbhutadhammo yaṃ disvā disvā asurā mahāsamudde abhiramanti.

Again, Bhante, the great ocean is rich in treasures, possessing many kinds of treasures. These treasures are such as pearls, gems, beryl, conch, stone, coral, silver, gold, and ruby. In that the great ocean is rich in treasures, possessing many kinds of treasures such as pearls, gems, beryl, conch, stone, coral, silver, gold, and ruby, this is the seventh wonderful and marvelous quality of the great ocean, seeing which the Asuras delight in it.

ปุนะ จะปะรัง, ภันเต, มะหาสะมุทโท มะหะตานัง ภูตานัง อาวาโส. ตัต๎ริเม ภูตา ติมิติมินคะลา ติมิระปิงคะลา อะสุรา นาคา คันธัพพา สันติ มะหาสะมุทเท, โยชะนะสะติกาปิ อัตตะภาวา, ท๎วิโยชะนะสะติกาปิ อัตตะภาวา, ติโยชะนะสะติกาปิ อัตตะภาวา, จะตุโยชะนะสะติกาปิ อัตตะภาวา, ปัญจะโยชะนะสะติกาปิ อัตตะภาวา. ยัมปิ, ภันเต, มะหาสะมุทโท มะหะตานัง ภูตานัง อาวาโส, ตัต๎ริเม ภูตา ติมิติมินคะลา ติมิระปิงคะลา อะสุรา นาคา คันธัพพา สันติ มะหาสะมุทเท, โย ชะนะสะติกาปิ อัตตะภาวา, ท๎เว ชะนะสะติกาปิ อัตตะภาวา, ตี ชะนะสะติกาปิ อัตตะภาวา, จะตุ ชะนะสะติกาปิ อัตตะภาวา, ปัญจะ ชะนะสะติกาปิ อัตตะภาวา, อะยัง ภันเต มะหาสะมุทเท อัฏฐะโม อัจฉะริโย อัพภุตะธัมโม ยัง ทิส๎วา ทิส๎วา อะสุรา มะหาสะมุทเท อะภิระมันติ. อิเม โข, ภันเต, มะหาสะมุทเท อัฏฐะ อัจฉะริยา อัพภุตะธัมมา เย ทิส๎วา ทิส๎วา อะสุรา มะหาสะมุทเท อะภิระมันติ.

Puna caparaṃ, bhante, mahāsamuddo mahatānaṃ bhūtānaṃ āvāso. Tatrime bhūtā timitimingalā timirapiṅgalā asurā nāgā gandhabbā santi mahāsamudde, yojanasatikāpi attabhāvā, dviyojanasatikāpi attabhāvā, tiyojanasatikāpi attabhāvā, catuyojanasatikāpi attabhāvā, pañcayojanasatikāpi attabhāvā. Yampi, bhante, mahāsamuddo mahatānaṃ bhūtānaṃ āvāso, tatrime bhūtā timitimingalā timirapiṅgalā asurā nāgā gandhabbā santi mahāsamudde, Yo janasatikāpi attabhāvā, dve janasatikāpi attabhāvā, tī janasatikāpi attabhāvā, catu janasatikāpi attabhāvā, pañca janasatikāpi attabhāvā, ayaṃ bhante mahāsamudde aṭṭhamo acchariyo abbhutadhammo yaṃ disvā disvā asurā mahāsamudde abhiramanti. Ime kho, bhante, mahāsamudde aṭṭha acchariyā abbhutadhammā ye disvā disvā asurā mahāsamudde abhiramanti.

Again, Bhante, the great ocean is the dwelling place of great beings. Therein exist beings such as timi, timingala, timirapiṅgala, asuras, nāgas, and gandhabbas in the great ocean, beings whose bodies are a hundred yojanas in size, two hundred yojanas in size, three hundred yojanas in size, four hundred yojanas in size, and five hundred yojanas in size. And also, Bhante, since the great ocean is the abode of such great beings, where these creatures-timi, timingala, timirapiṅgala, asuras, nāgas, and gandhabbas-exist, with bodies measuring one hundred yojanas, two hundred yojanas, three hundred yojanas, four hundred yojanas, and five hundred yojanas, These, Bhante, are the eight wonderful and marvelous qualities of the great ocean; seeing them again and again, the asuras take delight in the great ocean.”

“อะปิ ปะนะ, ภันเต, ภิกขู อิมัส๎มิง ธัมมะวินะเย อะภิระมันตี”ติ “อะภิระมันติ, ปะหาราทะ, ภิกขู อิมัส๎มิง ธัมมะวินะเย”ติ. “กะติ ปะนะ, ภันเต, อิมัส๎มิง ธัมมะวินะเย อัจฉะริยา อัพภุตะธัมมา เย ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันตี”ติ? “อัฏฐะ, ปะหาราทะ, อิมัส๎มิง ธัมมะวินะเย อัจฉะริยา อัพภุตะธัมมา เย ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ. กะตะเม อัฏฐะ?

“Api pana, bhante, bhikkhū imasmiṃ dhammavinaye abhiramantī”ti “Abhiramanti, Pahārāda, bhikkhū imasmiṃ dhammavinaye”ti. “Kati pana, bhante, imasmiṃ dhammavinaye acchariyā abbhutadhammā ye disvā disvā bhikkhū imasmiṃ dhammavinaye abhiramantī”ti? “Aṭṭha, Pahārāda, imasmiṃ dhammavinaye acchariyā abbhutadhammā ye disvā disvā bhikkhū imasmiṃ dhammavinaye abhiramanti. Katame aṭṭha?

“Bhante, do the monks delight in this Dhamma and discipline?” “They do, Pahārāda, the monks delight in this Dhamma and discipline.” “How many, Bhante, are the wonderful and marvelous qualities in this Dhamma and discipline, seeing which the monks delight in it?” “There are eight, Pahārāda, wonderful and marvelous qualities in this Dhamma and discipline, seeing which the monks delight in it. What eight?

เสยยะถาปิ, ปะหาราทะ, มะหาสะมุทโท อะนุปุพพะนินโน อะนุปุพพะโปโณ อะนุปุพพะปัพภาโร, นายะตะเกเนวะ ปะปาโต, เอวะเมวะ โข, ปะหาราทะ, อิมัส๎มิง ธัมมะวินะเย อะนุปุพพะสิกขา อะนุปุพพะกิริยา อะนุปุพพะปะฏิปะทา, นายะตะเกเนวะ อัญญาปะฏิเวโธ. ยัมปิ, ปะหาราทะ, อิมัส๎มิง ธัมมะวินะเย อะนุปุพพะสิกขา อะนุปุพพะกิริยา อะนุปุพพะปะฏิปะทา, นายะตะเกเนวะ อัญญาปะฏิเวโธ, อะยัง, ปะหาราทะ, อิมัส๎มิง ธัมมะวินะเย ปะฐะโม อัจฉะริโย อัพภุตะธัมโม ยัง ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ.

Seyyathāpi, Pahārāda, mahāsamuddo anupubbaninno anupubbapoṇo anupubbapabbhāro, nāyatakeneva papāto, evameva kho, Pahārāda, imasmiṃ dhammavinaye anupubbasikkhā anupubbakiriyā anupubbapaṭipadā, nāyatakeneva aññāpaṭivedho. Yampi, Pahārāda, imasmiṃ dhammavinaye anupubbasikkhā anupubbakiriyā anupubbapaṭipadā, nāyatakeneva aññāpaṭivedho, ayaṃ, Pahārāda, imasmiṃ dhammavinaye paṭhamo acchariyo abbhutadhammo yaṃ disvā disvā bhikkhū imasmiṃ dhammavinaye abhiramanti.

Just as, Pahārāda, the great ocean has a gradual slope, a gradual incline, a gradual depth, and does not suddenly drop off, even so, Pahārāda, in this Dhamma and discipline there is gradual training, gradual practice, gradual progress; there is no sudden realization. In that there is gradual training, gradual practice, and gradual progress without sudden realization, this is the first wonderful and marvelous quality in this Dhamma and discipline, seeing which the monks delight in it.

เสยยะถาปิ, ปะหาราทะ, มะหาสะมุทโท ฐิตะธัมโม เวลัง นาติวัตตะติ, เอวะเมวะ โข, ปะหาราทะ, ยัง มะยา สาวะกานัง สิกขาปะทัง ปัญญัตตัง, ตัง มะมะ สาวะกา ชีวิตะเหตุปิ นาติกกะมันติ. ยัมปิ, ปะหาราทะ, มะยา สาวะกานัง สิกขาปะทัง ปัญญัตตัง, ตัง มะมะ สาวะกา ชีวิตะเหตุปิ นาติกกะมันติ, อะยัง ปะหาราทะ อิมัส๎มิง ธัมมะวินะเย ทุติโย อัจฉะริโย อัพภุตะธัมโม ยัง ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ.

Seyyathāpi, Pahārāda, mahāsamuddo ṭhitadhammo velaṃ nātivattati, evameva kho, Pahārāda, yaṃ mayā sāvakānaṃ sikkhāpadaṃ paññattaṃ, taṃ mama sāvakā jīvitahetupi nātikkamanti. Yampi, Pahārāda, mayā sāvakānaṃ sikkhāpadaṃ paññattaṃ, taṃ mama sāvakā jīvitahetupi nātikkamanti, ayaṃ Pahārāda imasmiṃ dhammavinaye dutiyo acchariyo abbhutadhammo yaṃ disvā disvā bhikkhū imasmiṃ dhammavinaye abhiramanti.

Just as, Pahārāda, the great ocean remains stable and does not overstep its boundary, even so, Pahārāda, whatever training rules I have laid down for my disciples, they do not transgress them even for the sake of life. In that the disciples do not transgress the training rules even for the sake of life, this is the second wonderful and marvelous quality in this Dhamma and discipline, seeing which the monks delight in it.

เสยยะถาปิ, ปะหาราทะ, มะหาสะมุทโท นะ มะเตนะ กุณะเปนะ สังวะสะติ, ยัง โหติ มะหาสะมุทเท มะตัง กุณะปัง ตัง ขิปปะเมวะ ตีรัง วาเหติ, ถะลัง อุสสาเทติ. เอวะเมวะ โข, ปะหาราทะ, โย โส ปุคคะโล ทุสสีโล ปาปะธัมโม อะสุจิสังกัสสะระสะมาจาโร ปะฏิจฉันนะกัมมันโต อัสสะมะโณ สะมะณะปะฏิญโญ อะพ๎รัห๎มะจารี พ๎รัห๎มะจาริปะฏิญโญ อันโตปูติ อะวัสสุโต กะสัมพุชาโต, นะ เตนะ สังโฆ สังวะสะติ, ขิปปะเมวะ นัง สันนิปะติต๎วา อุกขิปะติ. กิญจาปิ โส โหติ มัชเฌ ภิกขุสังฆัสสะ นิสินโน, อะถะ โข โส อาระกาวะ สังฆัมหา, สังโฆ จะ เตนะ. ยัมปิ, ปะหาราทะ, โย ปุคคะโล ทุสสีโล ปาปะธัมโม อะสุจิสังกัสสะระสะมาจาโร ปะฏิจฉันนะกัมมันโต อัสสะมะโณ สะมะณะปะฏิญโญ อะพ๎รัห๎มะจารี พ๎รัห๎มะจาริปะฏิญโญ อันโตปูติ อะวัสสุโต กะสัมพุชาโต, นะ เตนะ สังโฆ สังวะสะติ, ขิปปัญเญวะ นัง สันนิปะติต๎วา อุกขิปะติ. กิญจาปิ โส โหติ มัชเฌ ภิกขุสังฆัสสะ นิสินโน, อะถะ โข โส อาระกาวะ สังฆัมหา, สังโฆ จะ เตนะ. อะยัง, ปะหาราทะ, อิมัส๎มิง ธัมมะวินะเย ตะติโย อัจฉะริโย อัพภุตะธัมโม ยัง ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ.

Seyyathāpi, Pahārāda, mahāsamuddo na matena kuṇapena saṃvasati, yaṃ hoti mahāsamudde mataṃ kuṇapaṃ taṃ khippameva tīraṃ vāheti, thalaṃ ussādeti. Evameva kho, Pahārāda, yo so puggalo dussīlo pāpadhammo asucisaṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto, na tena saṅgho saṃvasati, khippameva naṃ sannipatitvā ukkhipati. Kiñcāpi so hoti majjhe bhikkhusaṅghassa nisinno, atha kho so ārakāva saṅghamhā, saṅgho ca tena. Yampi, Pahārāda, yo puggalo dussīlo pāpadhammo asucisaṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto, na tena saṅgho saṃvasati, khippaññeva naṃ sannipatitvā ukkhipati. Kiñcāpi so hoti majjhe bhikkhusaṅghassa nisinno, atha kho so ārakāva saṅghamhā, saṅgho ca tena. Ayaṃ, Pahārāda, imasmiṃ dhammavinaye tatiyo acchariyo abbhutadhammo yaṃ disvā disvā bhikkhū imasmiṃ dhammavinaye abhiramanti.

Just as, Pahārāda, the great ocean does not associate with a corpse, but quickly carries it to the shore and throws it up on land, even so, Pahārāda, a person who is immoral, of bad conduct, impure, of doubtful behavior, secretive in deeds, not a true ascetic though claiming to be one, not living the holy life though claiming to do so, inwardly rotten, corrupt-such a person is not lived with by the Saṅgha. The Saṅgha quickly assembles and expels him. Even if he is sitting in the midst of the Saṅgha, he is far from the Saṅgha, and the Saṅgha is far from him. In that such a person is not lived with by the Saṅgha and is quickly expelled, this is the third wonderful and marvelous quality in this Dhamma and discipline, seeing which the monks delight in it.

เสยยะถาปิ, ปะหาราทะ, ยา กาจิ มะหานะทิโย เสยยะถิทัง คังคา ยะมุนา อะจิระวะตี สะระภู มะหี, ตา มะหาสะมุททัง ปัต๎วา ชะหันติ ปุริมานิ นามะโคตตานิ, มะหาสะมุทโทต๎เววะ สังขัง คัจฉันติ. เอวะเมวะ โข, ปะหาราทะ, จัตตาโรเม วัณณา ขัตติยา พ๎ราห๎มะณา เวสสา สุททา, เต ตะถาคะตัปปะเวทิเต ธัมมะวินะเย อะคารัส๎มา อะนะคาริยัง ปัพพะชิต๎วา ชะหันติ ปุริมานิ นามะโคตตานิ, สะมะณา สัก๎ยะปุตติโยต๎เววะ สังขัง คัจฉันติ. ยัมปิ, ปะหาราทะ, จัตตาโรเม วัณณา ขัตติยา พ๎ราห๎มะณา เวสสา สุททา, เต ตะถาคะตัปปะเวทิเต ธัมมะวินะเย อะคารัส๎มา อะนะคาริยัง ปัพพะชิต๎วา ชะหันติ ปุริมานิ นามะโคตตานิ, สะมะณา สัก๎ยะปุตติโยต๎เววะ สังขัง คัจฉันติ, อะยัมปิ, ปะหาราทะ, อิมัส๎มิง ธัมมะวินะเย จะตุตโถ อัจฉะริโย อัพภุตะธัมโม ยัง ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ.

Seyyathāpi, Pahārāda, yā kāci mahānadiyo seyyathidaṃ Gaṅgā Yamunā Aciravatī Sarabhū Mahī, tā mahāsamuddaṃ patvā jahanti purimāni nāmagottāni, mahāsamuddotveva saṅkhaṃ gacchanti. Evameva kho, Pahārāda, cattārome vaṇṇā khattiyā brāhmaṇā vessā suddā, te Tathāgatappavedite dhammavinaye agārasmā anagāriyaṃ pabbajitvā jahanti purimāni nāmagottāni, samaṇā Sakyaputtiyotveva saṅkhaṃ gacchanti. Yampi, Pahārāda, cattārome vaṇṇā khattiyā brāhmaṇā vessā suddā, te Tathāgatappavedite dhammavinaye agārasmā anagāriyaṃ pabbajitvā jahanti purimāni nāmagottāni, samaṇā Sakyaputtiyotveva saṅkhaṃ gacchanti, ayampi, Pahārāda, imasmiṃ dhammavinaye catuttho acchariyo abbhutadhammo yaṃ disvā disvā bhikkhū imasmiṃ dhammavinaye abhiramanti.

Just as, Pahārāda, whatever great rivers there are-such as the Ganges, Yamunā, Aciravatī, Sarabhū, and Mahī-upon reaching the great ocean abandon their former names and identities and are known simply as the great ocean, even so, Pahārāda, the four castes-nobles, brahmins, merchants, and workers-upon going forth from the household life into homelessness in this Dhamma and discipline proclaimed by the Tathāgata, abandon their former names and identities and are known simply as ascetics, sons of the Sakyan. In that they abandon their former identities and are known as ascetics, sons of the Sakyan, this is the fourth wonderful and marvelous quality in this Dhamma and discipline, seeing which the monks delight in it.

เสยยะถาปิ, ปะหาราทะ, ยา กาจิ โลเก สะวันติโย มะหาสะมุททัง อัปเปนติ, ยา จะ อันตะลิกขา ธารา ปะปะตันติ, นะ เตนะ มะหาสะมุททัสสะ อูนัตตัง วา ปูรัตตัง วา ปัญญายะติ. เอวะเมวะ โข, ปะหาราทะ, พะหู เจปิ ภิกขู อะนุปาทิเสสายะ นิพพานะธาตุยา ปะรินิพพายันติ, นะ เตนะ นิพพานะธาตุยา อูนัตตัง วา ปูรัตตัง วา ปัญญายะติ. ยัมปิ, ปะหาราทะ, พะหู เจปิ ภิกขู อะนุปาทิเสสายะ นิพพานะธาตุยา ปะรินิพพายันติ, นะ เตนะ นิพพานะธาตุยา อูนัตตัง วา ปูรัตตัง วา ปัญญายะติ, อะยัง ปะหาราทะ อิมัส๎มิง ธัมมะวินะเย ปัญจะโม อัจฉะริโย อัพภุตะธัมโม ยัง ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ.

Seyyathāpi, Pahārāda, yā kāci loke savantiyo mahāsamuddaṃ appenti, yā ca antalikkhā dhārā papatanti, na tena mahāsamuddassa ūnattaṃ vā pūrattaṃ vā paññāyati. Evameva kho, Pahārāda, bahū cepi bhikkhū anupādisesāya nibbānadhātuyā parinibbāyanti, na tena nibbānadhātuyā ūnattaṃ vā pūrattaṃ vā paññāyati. Yampi, Pahārāda, bahū cepi bhikkhū anupādisesāya nibbānadhātuyā parinibbāyanti, na tena nibbānadhātuyā ūnattaṃ vā pūrattaṃ vā paññāyati, ayaṃ Pahārāda imasmiṃ dhammavinaye pañcamo acchariyo abbhutadhammo yaṃ disvā disvā bhikkhū imasmiṃ dhammavinaye abhiramanti.

Just as, Pahārāda, whatever streams in the world flow into the great ocean and whatever rain falls from the sky, the great ocean is not seen to increase or decrease, even so, Pahārāda, though many monks attain final Nibbāna without remainder, by that the element of Nibbāna is not seen to increase or decrease. In that Nibbāna is not increased or diminished though many attain it, this is the fifth wonderful and marvelous quality in this Dhamma and discipline, seeing which the monks delight in it.

เสยยะถาปิ, ปะหาราทะ, มะหาสะมุทโท เอกะระโส โลณะระโส, เอวะเมวะ โข, ปะหาราทะ, อะยัง ธัมมะวินะโย เอกะระโส วิมุตติระโส. ยัมปิ, ปะหาราทะ, อะยัง ธัมมะวินะโย เอกะระโส วิมุตติระโส, อะยัง ปะหาราทะ อิมัส๎มิง ธัมมะวินะเย ฉัฏโฐ อัจฉะริโย อัพภุตะธัมโม ยัง ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ.

Seyyathāpi, Pahārāda, mahāsamuddo ekaraso loṇaraso, evameva kho, Pahārāda, ayaṃ dhammavinayo ekaraso vimuttiraso. Yampi, Pahārāda, ayaṃ dhammavinayo ekaraso vimuttiraso, ayaṃ Pahārāda imasmiṃ dhammavinaye chaṭṭho acchariyo abbhutadhammo yaṃ disvā disvā bhikkhū imasmiṃ dhammavinaye abhiramanti.

Just as, Pahārāda, the great ocean has one taste, the taste of salt, even so, Pahārāda, this Dhamma and discipline has one taste, the taste of liberation. In that this Dhamma and discipline has one taste, the taste of liberation, this is the sixth wonderful and marvelous quality in this Dhamma and discipline, seeing which the monks delight in it.

เสยยะถาปิ, ปะหาราทะ, มะหาสะมุทโท พะหุระตะโน อะเนกะระตะโน, ตัต๎ริมานิ ระตะนานิ เสยยะถิทัง มุตตา มะณิ เวฬุริโย สังโข สิลา ปะวาฬัง ระชะตัง ชาตะรูปัง โลหิตะโก มะสาระคัลลัง. เอวะเมวะ โข, ปะหาราทะ, อะยัง ธัมมะวินะโย พะหุระตะโน อะเนกะระตะโน. ตัต๎ริมานิ ระตะนานิ เสยยะถิทัง จัตตาโร สะติปัฏฐานา จัตตาโร สัมมัปปะธานา จัตตาโร อิทธิปาทา ปัญจินท๎ริยานิ ปัญจะ พะลานิ สัตตะ โพชฌังคา อะริโย อัฏฐังคิโก มัคโค. ยัมปิ, ปะหาราทะ, อะยัง ธัมมะวินะโย พะหุระตะโน อะเนกะระตะโน, ตัต๎ริมานิ ระตะนานิ เสยยะถิทัง จัตตาโร สะติปัฏฐานา จัตตาโร สัมมัปปะธานา จัตตาโร อิทธิปาทา ปัญจินท๎ริยานิ ปัญจะ พะลานิ สัตตะ โพชฌังคา อะริโย อัฏฐังคิโก มัคโค, อะยัง ปะหาราทะ อิมัส๎มิง ธัมมะวินะเย สัตตะโม อัจฉะริโย อัพภุตะธัมโม ยัง ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ.

Seyyathāpi, Pahārāda, mahāsamuddo bahuratano anekaratano, tatrimāni ratanāni seyyathidaṃ muttā maṇi veḷuriyo saṅkho silā pavāḷaṃ rajataṃ jātarūpaṃ lohitako masāragallaṃ. Evameva kho, Pahārāda, ayaṃ dhammavinayo bahuratano anekaratano. Tatrimāni ratanāni seyyathidaṃ cattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta bojjhaṅgā ariyo aṭṭhaṅgiko maggo. Yampi, Pahārāda, ayaṃ dhammavinayo bahuratano anekaratano, tatrimāni ratanāni seyyathidaṃ cattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta bojjhaṅgā ariyo aṭṭhaṅgiko maggo, ayaṃ Pahārāda imasmiṃ dhammavinaye sattamo acchariyo abbhutadhammo yaṃ disvā disvā bhikkhū imasmiṃ dhammavinaye abhiramanti.

Just as, Pahārāda, the great ocean is rich in treasures, possessing many kinds of treasures such as pearls, gems, beryl, conch, stone, coral, silver, gold, and ruby, even so, Pahārāda, this Dhamma and discipline is rich in treasures, possessing many kinds of treasures. These treasures are: the four establishments of mindfulness, the four right efforts, the four bases of spiritual power, the five faculties, the five powers, the seven factors of awakening, and the noble eightfold path. In that this Dhamma and discipline is rich in treasures with these qualities, this is the seventh wonderful and marvelous quality in this Dhamma and discipline, seeing which the monks delight in it.

เสยยะถาปิ, ปะหาราทะ, มะหาสะมุทโท มะหะตานัง ภูตานัง อาวาโส. ตัต๎ริเม ภูตา ติมิติมินคะลา ติมิระปิงคะลา อะสุรา นาคา คันธัพพา สันติ มะหาสะมุทเท, โยชะนะสะติกาปิ อัตตะภาวา, ท๎วิโยชะนะสะติกาปิ อัตตะภาวา, ติโยชะนะสะติกาปิ อัตตะภาวา, จะตุโยชะนะสะติกาปิ อัตตะภาวา, ปัญจะโยชะนะสะติกาปิ อัตตะภาวา. เอวะเมวะ โข, ปะหาราทะ, อะยัง ธัมมะวินะโย มะหะตานัง ภูตานัง อาวาโส. ตัต๎ริเม ภูตา โสตาปันโน โสตาปัตติผะละสัจฉิกิริยายะ ปะฏิปันโน, สะกะทาคามี สะกะทาคามิผะละสัจฉิกิริยายะ ปะฏิปันโน, อะนาคามี อะนาคามิผะละสัจฉิกิริยายะ ปะฏิปันโน, อะระหา อะระหัตตายะ ปะฏิปันโน. ยัมปิ, ปะหาราทะ, อะยัง ธัมมะวินะโย มะหะตานัง ภูตานัง อาวาโส, ตัต๎ริเม ภูตา โสตาปันโน โสตาปัตติผะละสัจฉิกิริยายะ ปะฏิปันโน, สะกะทาคามี สะกะทาคามิผะละสัจฉิกิริยายะ ปะฏิปันโน, อะนาคามี อะนาคามิผะละสัจฉิกิริยายะ ปะฏิปันโน, อะระหา อะระหัตตายะ ปะฏิปันโน, อะยัง ปะหาราทะ อิมัส๎มิง ธัมมะวินะเย อัฏฐะโม อัจฉะริโย อัพภุตะธัมโม ยัง ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันติ. อิเม โข, ปะหาราทะ, อิมัส๎มิง ธัมมะวินะเย อัฏฐะ อัจฉะริยา อัพภุตะธัมมา เย ทิส๎วา ทิส๎วา ภิกขู อิมัส๎มิง ธัมมะวินะเย อะภิระมันตี”ติ.

Seyyathāpi, Pahārāda, mahāsamuddo mahatānaṃ bhūtānaṃ āvāso. Tatrime bhūtā timitimingalā timirapiṅgalā asurā nāgā gandhabbā santi mahāsamudde, yojanasatikāpi attabhāvā, dviyojanasatikāpi attabhāvā, tiyojanasatikāpi attabhāvā, catuyojanasatikāpi attabhāvā, pañcayojanasatikāpi attabhāvā. Evameva kho, Pahārāda, ayaṃ dhammavinayo mahatānaṃ bhūtānaṃ āvāso. Tatrime bhūtā sotāpanno sotāpattiphalasacchikiriyāya paṭipanno, sakadāgāmī sakadāgāmiphalasacchikiriyāya paṭipanno, anāgāmī anāgāmiphalasacchikiriyāya paṭipanno, arahā arahattāya paṭipanno. Yampi, Pahārāda, ayaṃ dhammavinayo mahatānaṃ bhūtānaṃ āvāso, tatrime bhūtā sotāpanno sotāpattiphalasacchikiriyāya paṭipanno, sakadāgāmī sakadāgāmiphalasacchikiriyāya paṭipanno, anāgāmī anāgāmiphalasacchikiriyāya paṭipanno, arahā arahattāya paṭipanno, ayaṃ Pahārāda imasmiṃ dhammavinaye aṭṭhamo acchariyo abbhutadhammo yaṃ disvā disvā bhikkhū imasmiṃ dhammavinaye abhiramanti. Ime kho, Pahārāda, imasmiṃ dhammavinaye aṭṭha acchariyā abbhutadhammā ye disvā disvā bhikkhū imasmiṃ dhammavinaye abhiramantī”ti.

Just as, Pahārāda, the great ocean is the dwelling place of great beings-such as timitimingalas, timirapiṅgalas, asuras, nāgas, and gandhabbas, of immense size-so too, Pahārāda, this Dhamma and discipline is the dwelling place of great beings. In it are beings such as a stream-enterer practicing for the realization of the fruit of stream-entry, a once-returner practicing for the realization of the fruit of once-returning, a non-returner practicing for the realization of the fruit of non-returning, and an arahant practicing for arahantship. In that this Dhamma and discipline is the dwelling place of such great beings, this is the eighth wonderful and marvelous quality in this Dhamma and discipline, seeing which the monks delight in it. These, Pahārāda, are the eight wonderful and marvelous qualities in this Dhamma and discipline, seeing which the monks delight in it.”