อัฏฐะ โข อิเม อานันทะ เหตู อัฏฐะ ปัจจะยา มะหะโต ภูมิจาลัสสะ ปาตุภาวายะ. กะตะเม อัฏฐะ.

Aṭṭha kho ime ānanda hetū aṭṭha paccayā mahato bhūmicālassa pātubhāvāya. Katame aṭṭha.

“Ānanda, there are these eight causes and conditions for the occurrence of a great earthquake. What eight?

อิธะ อานันทะ มะหาปะถะวี อุทะเก ปะติฏฐิตา อุทะกัง วาเต ปะติฏฐิตัง วาโต อากาสัฏโฐ โหติ. โส โข อานันทะ สะมะโย ยัง มะหาวาตา วายันติ. มะหาวาตา วายันตา อุทะกัง กัมเปนติ. อุทะกัง กัมปะมานัง ปะถะวิง กัมเปติ. อะยัง ปะฐะโม เหตุ ปะฐะโม ปัจจะโย มะหะโต ภูมิจาลัสสะ ปาตุภาวายะ.

Idha ānanda mahāpathavī udake patiṭṭhitā udakaṃ vāte patiṭṭhitaṃ vāto ākāsaṭṭho hoti. So kho ānanda samayo yaṃ mahāvātā vāyanti. Mahāvātā vāyantā udakaṃ kampenti. Udakaṃ kampamānaṃ pathaviṃ kampeti. Ayaṃ paṭhamo hetu paṭhamo paccayo mahato bhūmicālassa pātubhāvāya.

Here, Ānanda, the great earth rests upon water, the water rests upon air, and the air rests upon space. At a time when powerful winds blow, the winds stir the water; when the water is stirred, it shakes the earth. This is the first cause and condition for the occurrence of a great earthquake.

ปุนะ จะปะรัง อานันทะ สะมะโณ วา พ๎ราห๎มะโณ วา อิทธิมา เจโตวะสิปปัตโต เทโว วา มะหิทธิโก มะหานุภาโว ตัสสะ ปะถะวีสัญญา ปะริตตา ภาวิตา โหติ อัปปะมาณา อาโปสัญญา. โส อิมัง ปะถะวิง กัมเปติ สังกัมเปติ สัมปะกัมเปติ สัมปะเวเธติ. อะยัง ทุติโย เหตุ ทุติโย ปัจจะโย มะหะโต ภูมิจาลัสสะ ปาตุภาวายะ.

Puna caparaṃ ānanda samaṇo vā brāhmaṇo vā iddhimā cetovasippatto devo vā mahiddhiko mahānubhāvo tassa pathavīsaññā parittā bhāvitā hoti appamāṇā āposaññā. So imaṃ pathaviṃ kampeti saṅkampeti sampakampeti sampavedheti. Ayaṃ dutiyo hetu dutiyo paccayo mahato bhūmicālassa pātubhāvāya.

Again, Ānanda, there may be an ascetic or brahmin with spiritual power, mastery of mind, or a powerful deity of great might and influence. If such a being has developed limited perception of earth and vast perception of water, he can shake, quake, and agitate the earth. This is the second cause and condition for the occurrence of a great earthquake.

ปุนะ จะปะรัง อานันทะ ยะทา โพธิสัตโต ตุสิตา กายา จะวิต๎วา สะโต สัมปะชาโน มาตุ กุจฉิง โอกกะมะติ ตะทา ปะถะวี กัมปะติ สังกัมปะติ สัมปะกัมปะติ สัมปะเวเธติ. อะยัง ตะติโย เหตุ ตะติโย ปัจจะโย มะหะโต ภูมิจาลัสสะ ปาตุภาวายะ.

Puna caparaṃ ānanda yadā bodhisatto tusitā kāyā cavitvā sato sampajāno mātu kucchiṃ okkamati tadā pathavī kampati saṅkampati sampakampati sampavedheti. Ayaṃ tatiyo hetu tatiyo paccayo mahato bhūmicālassa pātubhāvāya.

Again, Ānanda, when the Bodhisatta passes away from the Tusita heaven and mindfully and clearly comprehending enters his mother's womb, at that time the earth shakes, quakes, trembles, and is agitated. This is the third cause and condition for the occurrence of a great earthquake.

ปุนะ จะปะรัง อานันทะ ยะทา โพธิสัตโต สะโต สัมปะชาโน มาตุ กุจฉิมหะ นิกขะมะติ ตะทา ปะถะวี กัมปะติ สังกัมปะติ สัมปะกัมปะติ สัมปะเวเธติ. อะยัง จะตุตโถ เหตุ จะตุตโถ ปัจจะโย มะหะโต ภูมิจาลัสสะ ปาตุภาวายะ.

Puna caparaṃ ānanda yadā bodhisatto sato sampajāno mātu kucchimha nikkhamati tadā pathavī kampati saṅkampati sampakampati sampavedheti. Ayaṃ catuttho hetu catuttho paccayo mahato bhūmicālassa pātubhāvāya.

Again, Ānanda, when the Bodhisatta mindfully and clearly comprehending emerges from his mother's womb, at that time the earth shakes, quakes, trembles, and is agitated. This is the fourth cause and condition for the occurrence of a great earthquake.

ปุนะ จะปะรัง อานันทะ ยะทา ตะถาคะโต อะนุตตะรัง สัมมาสัมโพธิง อะภิสัมพุชฌะติ ตะทา ปะถะวี กัมปะติ สังกัมปะติ สัมปะกัมปะติ สัมปะเวเธติ. อะยัง ปัญจะโม เหตุ ปัญจะโม ปัจจะโย มะหะโต ภูมิจาลัสสะ ปาตุภาวายะ.

Puna caparaṃ ānanda yadā tathāgato anuttaraṃ sammāsambodhiṃ abhisambujjhati tadā pathavī kampati saṅkampati sampakampati sampavedheti. Ayaṃ pañcamo hetu pañcamo paccayo mahato bhūmicālassa pātubhāvāya.

Again, Ānanda, when the Tathāgata attains unsurpassed perfect enlightenment, at that time the earth shakes, quakes, trembles, and is agitated. This is the fifth cause and condition for the occurrence of a great earthquake.

ปุนะ จะปะรัง อานันทะ ยะทา ตะถาคะโต อะนุตตะรัง ธัมมะจักกัง ปะวัตเตติ ตะทา ปะถะวี กัมปะติ สังกัมปะติ สัมปะกัมปะติ สัมปะเวเธติ. อะยัง ฉัฏโฐ เหตุ ฉัฏโฐ ปัจจะโย มะหะโต ภูมิจาลัสสะ ปาตุภาวายะ.

Puna caparaṃ ānanda yadā tathāgato anuttaraṃ dhammacakkaṃ pavatteti tadā pathavī kampati saṅkampati sampakampati sampavedheti. Ayaṃ chaṭṭho hetu chaṭṭho paccayo mahato bhūmicālassa pātubhāvāya.

Again, Ānanda, when the Tathāgata sets in motion the unsurpassed Wheel of Dhamma, at that time the earth shakes, quakes, trembles, and is agitated. This is the sixth cause and condition for the occurrence of a great earthquake.

ปุนะ จะปะรัง อานันทะ ยะทา ตะถาคะโต สะโต สัมปะชาโน อายุสังขารัง โอสสัชชะติ ตะทา ปะถะวี กัมปะติ สังกัมปะติ สัมปะกัมปะติ สัมปะเวเธติ. อะยัง สัตตะโม เหตุ สัตตะโม ปัจจะโย มะหะโต ภูมิจาลัสสะ ปาตุภาวายะ.

Puna caparaṃ ānanda yadā tathāgato sato sampajāno āyusaṅkhāraṃ ossajjati tadā pathavī kampati saṅkampati sampakampati sampavedheti. Ayaṃ sattamo hetu sattamo paccayo mahato bhūmicālassa pātubhāvāya.

Again, Ānanda, when the Tathāgata mindfully and clearly comprehending relinquishes the life-force, at that time the earth shakes, quakes, trembles, and is agitated. This is the seventh cause and condition for the occurrence of a great earthquake.

ปุนะ จะปะรัง อานันทะ ยะทา ตะถาคะโต อะนุปาทิเสสายะ นิพพานะธาตุยา ปะรินิพพายะติ ตะทา ปะถะวี กัมปะติ สังกัมปะติ สัมปะกัมปะติ สัมปะเวเธติ. อะยัง อัฏฐะโม เหตุ อัฏฐะโม ปัจจะโย มะหะโต ภูมิจาลัสสะ ปาตุภาวายะ.

Puna caparaṃ ānanda yadā tathāgato anupādisesāya nibbānadhātuyā parinibbāyati tadā pathavī kampati saṅkampati sampakampati sampavedheti. Ayaṃ aṭṭhamo hetu aṭṭhamo paccayo mahato bhūmicālassa pātubhāvāya.

Again, Ānanda, when the Tathāgata passes away into the element of Nibbāna without remainder, at that time the earth shakes, quakes, trembles, and is agitated. This is the eighth cause and condition for the occurrence of a great earthquake.

อิเม โข อานันทะ อัฏฐะ เหตู อัฏฐะ ปัจจะยา มะหะโต ภูมิจาลัสสะ ปาตุภาวายาติ.

Ime kho ānanda aṭṭha hetū aṭṭha paccayā mahato bhūmicālassa pātubhāvāyāti.

These, Ānanda, are the eight causes and conditions for the occurrence of a great earthquake.”